मानव लिंगबाट भव्य स्वागत

मानव समाजमा अचम्मका प्रचलन हुँदारहेछन् । भुटानको पुनाखा गाउँमा पुग्दा यो साता अनौठो दृश्य देखियो । यो गाउँमा प्रत्येक घरका भित्तामा मानव लिंगको आकृति देख्न पाइयो ।

बाटैदेखि लिंगबाटै स्वागत गरिने यो गाउँमा मानव लिंगको पूजा गर्नका लागि मन्दिरसमेत बनेको छ । छिमिलाखाङ मन्दिरमा बुद्धको मूर्तिसँगै मावल लिंगको प्रतिमा राखिएको छ ।

भुटानको सोप्सोखा गाउँका सबै घरमा लिंगको चित्र बनाएको देखिन्थ्यो । परापूर्वकालमा लिंगबाट पिच्किरी हानेर राक्षसहरु भगाएको किम्बदन्ती स्थानीय सुनाए ।

घरघरमा लिंगको चित्र बनाएको देख्दा बाहिरबाट जानेहरुलाई केही असहज र लाज लागेजस्तो महसुस हुन्छ । होटल तथा पसलको काउन्टरमा समेत लिंगै लिंग राखेको देखिन्छ । यहाँका स्थानीयलाई भने यो सामान्यजस्तै भइसकेको छ ।

यहाँका पसलमा काठबाट बनाएका लिंग बिक्री गर्न राखिएको थियो । त्यहाँ पुग्नेहरुले लिंग किनेर घर लैजाने गरेको गाइड दोर्जीले बताए । स्थानीय एक पसलेका अनुसार उनको पसलबाट दैनिक २०/२५ वटासम्म लिंग बिक्री हुने गरेको छ ।

न्यूनतम दुई सयदेखि दुई हजार गुल्टनसम्मका लिंगहरु बिक्रीमा राखिएको थिए । कतिपय लिंगलाई चाबी राख्ने झुत्तोसमेत बनाएर बिक्री गरेको देखिन्थ्यो । नेपालीहरु लिंग देख्दै लजाउने गरे पनि विदेशीहरुले चाहिँ लाज नमानी लिंग किनेर लैजाने गरेको देखियो ।

छिमिलाखाङ मन्दिर पुनखा बजारबाट १० किलोमिटरको दुरीमा रहेको भने सोप्सोखा गाउँबाट १५ मिनेट हिँड्नुपर्छ ।

निसन्तानलाई सन्तान लाभ विश्वास

भुटानकै मानिने चर्चित यस मन्दिरमा गएर पुजा गरेमा छोराछोरी हुने विश्वास गरिन्छ । यहाँ पुरुषको लिंगलाई भगवानसरह पूजा गरिन्छ । बिधिपूर्वक लिंग पुजा गरेपछि छोराछोरी प्राप्त हुने भिक्षुहरु दाबी गर्छन् ।

बुद्धिष्ट संस्कृतिअनुसार लिंगको पूजा गर्न लामा डुक्पा किन्लेले सुरु गरेको नोर्बु भुटान ट्राभलका गाइड तेन्दिन दोर्जीले जानकारी दिए । पछि १५औं शताब्दीमा यहाँ न्गाङ चोयग्येलले मन्दिर बनाएका थिए ।
छोराछोरी नहुनेहरुको यस मन्दिरमा भिड लाग्ने गरेको पूजारीले बताए । नेपाली पत्रकारको टोली मन्दिरमा पुग्दा भुटानी र विदेशीहरु धमाधम लिंगको पूजा गरिरहेका थिए ।

एक जापानी दम्पत्तीले यहाँ पूजा गरेपछि पुत्रलाभ भएको बताए । उनीहरुले लामो समय सन्तान नभएपछि यहाँ आएर पुजा गरेपछि सन्तान प्राप्त गरेको बताए ।

गाइड दर्जीका अनुसार स्वदेशबाट मात्र नभई विदेशबाट समेत उत्तिकै संख्यामा दशनार्थी लागि आउने गर्छन् । दोर्जीले नेपाली पत्रकारको टोलीलाई समेत सन्तान नभए छिमिलाखाङ आउन सल्लाह दिए ।