फागुन २२ – नेपाल टेलिकमले आफूले दिने सेवा उपभोक्ताले घरमा नै बसेर जानकारी पाउन सकुन् भन्दै नेपाल टेलिकम एप बनाएको छ । टेलिकमले सोमबार काठमाडौंमा पत्रकार सम्मेलन गरी एपबारे जानकारी दिएको हो ।
टेलिकमले एक वर्ष पहिले नै सार्वजनिक गरेको एपले बल्ल पूर्णता पाएको हो । एक वर्षको बीचमा एपमा धेरै फिचरहरु राखिएको टेलिकमका अधिकारीले बताएका छन् ।
स्मार्टफोन बोक्ने उपभोक्ताले प्रयोग गर्न मिल्ने एपबाट टेलिकमले उपलब्ध गराउने सेवा घरमै बसेर लिन सकिने टेलिकमका अधिकारीको दाबी छ । उनीहरुका अनुसार, टेलिकमका मोबाइल फोन प्रयोग गर्ने ग्राहकमध्ये अहिले करिब ३० लाखसँग स्मार्टफोन छ ।
टेलिकमका प्रबन्ध निर्देशक बुद्धिप्रसाद आचार्यले ग्राहकले बिनाअवरोध घरमै बसेर आफ्ना सेवा उपभोग गर्न पाउन् भनेर एप बनाइएको भन्दै एपलाई ग्राहकको सुझाव अनुसार अझै परिस्कृत गरिने बताउनुभयो । टेलिकमसँग अहिले मोबाइल फोन प्रयोग गर्ने ग्राहकको संख्या ९० लाख छ ।