स्वाइनफ्लुबाट काठमाडौंमा एक महिलाको मृत्यु भएको छ । काठमाडौंको मोडल अस्पतालमा उपचार गर्दागर्दै काठमाडौं क्षेत्रपाटीकी ५० बर्षीया महिलाको शनिबार मृत्यु भएको हो ।
इपिडिमियोलोजी तथा रोग नियन्त्रण महाशाखाले यसको आइतबार मात्रै पुष्टि गरेको छ । मृतक महिलाको परिचय गोप्य राखिएको छ ।
उनको आईसीयूमा राखेर उपचार गर्दागर्दै मृत्यु भएको बताइएको छ । तर, हामी सँग कुरा गर्दै महाशाखा प्रमुख बाबुराम मरासिनीले भने विस्तृत विवरणको लागि केही समय कुर्न आग्रह गरे ।
ति महिलामा स्वाइन फ्लु भएको भनेर अस्पतालले गत विहीबार पुष्टि गरेको थियो । रुघा लाग्ने, टाउको दुख्ने, स्वासप्रश्वासमा समस्या भएपछि उनलाई १५ दिनअघि अस्पताल भर्ना गरिएको थियो ।
भारतमा महामारीको रुपमा फैलिएको स्वाइनफ्लु संक्रमित विरामीको संख्या नेपालमा झण्डै ३० पुगिसकेको छ ।