चार दिनदेखि छट्पटाएकी गर्भवतीको यसरी भयो उद्धार

बाजुरा, असार ११ – चार दिनदेखि सुत्केरी व्यथाले छट्पटाइरहेकी बाजुराको गोत्रीकी गर्भवतीलाई आइतबार बिहान उपचारका लागि हेलिकप्टरमार्फत नेपालगञ्ज पुर्‍याइएको छ । बाजुरा सदरमुकाम मार्तडीदेखि दुई दिनको पैदल दूरीमा पर्ने साविकको गोत्री गाविस–७ मा विपन्न दलित परिवारकी ४१ वर्षीया फूलटुका ढोली सुत्केरी हुन नसकेर छट्पटाई रहनुभएको थियो । ज्यानै जोखिममा पुगेको खबर पाएपछि जिल्ला स्वास्थ्य कार्यालयको पहलमा आइतवार बिहान सिम्रिक एयरको हेलिकप्टर गाउँमै अवतरण गराएर नेपालगञ्ज पठाइएको जिल्ला कार्यालयका प्रमुख डा. रुपचन्द्र विश्वकर्माले जानकारी दिनुभयो ।

फूलटुकालाई बिहीबार सुत्केरी व्यथा सुरु भएको थियो । एक दिन घरमै पर्खदा सुत्केरी हुन नसकेपछि उहाँका पति जयलाल ढोलीले दोस्रो दिन हुनी स्वास्थ्य चौकी लैजानुभएको थियो । स्थानीय स्वास्थ्य चौकीका स्वास्थ्यकर्मीले प्रसुती गराउन नसकेर रेफर गरेका थिए । तर उनलाई अन्यत्र लैजान परिवारको आर्थिक अवस्था कमजोर भएकाले त्यही थन्किनुभएको थियो । ‘हाम्रो पहलमा परिवार स्वास्थ्य महाशाखाले चार लाख ५० हजार रुपयाँ आर्थिक सहयोग गर्ने आश्वासन दिएपछि फूलटुकाको उद्धार सम्भव भएको हो’ जिल्ला स्वास्थ्य कार्यालयकी परिवार नियोजन सुपरभाइजर दुर्गा बजगाँईले भन्नुभयो । उनलाई नेपाली सेनाले बोकेर हेलिकप्टरमा चढाएको थियो । फूलटुकाको यो छैटौं गर्भ हो ।ujyaaloonline

http://ift.tt/eA8V8J