बाढीमा बालक बगाएका परिवार उपराष्ट्रपतिका छोरासँग भक्कानिए

काठमाडौं, साउन ३२ – गाड्ने ठाउँ नभएर बाढीमा बालक बगाएका सप्तरीका परिवारलाई उपराष्ट्रपति नन्दबहादुर पुनका छोरा दिपेश पुनले आर्थिक सहयोग गर्नुभएको छ ।

दिपेशले कमद सदाको परिवारलाई २० हजार रुपैयाँ नगद र दाल चामल, चिनी, चिउरा र भाँडाकुँडा सहयोग गर्नुभएको हो । सप्तरीको कोइलाडी–६ का ८ वर्षका कमल सदाको डुबेर ज्यान गएपछि गाड्ने ठाउँ पनि नहुँदा सदा परिवारले उनको शव बाढीमै बगाइदिएको घटना अन्तर्राष्ट्रिय मिडियामा समेत चर्चामा आएको थियो ।

अखिल क्रान्तिकारीको कार्यक्रमको लागि इटहरीमा रहेका बेला बाढी आएपछि दिपेश पुन इटहरी, सिरहा, सप्तरी लगायतका बाढीपीडितको उद्दारमा जुट्नुभएको थियो । ‘हुन त डुवानमा परेका धेरैजसो परिवारको विचल्ली भएको छ, तर यहाँको सदा परिवारको निक्कै नै विजोग देखेँ र केही महिनाको पकेटखर्च सहयोग गरेको हुँ’ पुनले उज्यालो अनलाइनसँग भन्नुभयो, ‘एकातिर परिवारको सदस्यलाई बाढीमा बगाउनुको पीडा त छँदैछ, अर्कातिर किरिया खर्च पनि नहुँदको दर्दनाक अवस्था देख्न सकिन र सहयोग गरेँ ।’

दिपेशले सहयोग गरेपछि सदा परिवारका सदस्य उहाँलाई अँगालो मारेर भक्कानिएका थिए । सरकारले तराइमा राहत तथा उद्दारमा तिव्रता दिएको जनाए पनि हजारौं परिवार अहिले पनि धेरै दिनदेखि भोकभोकै पानीमै डुवेर बसेको आफूले देखेको उहाँले बताउनुभयो । सदा परिवारको विचल्ली देखेर मन छिया छिया भएको पनि दिपेशले आफ्नो फेसबुक पेजमा लेखेका छन् । ujyaaloonline